શાપર-વેરાવળમાં LCBનો મોટો સપાટો: ટ્રકમાંથી રૂ. 34.05 લાખનો વિદેશી દારૂ ઝડપાયો.

રાજકોટ-ગોંડલ નેશનલ હાઇવે પર પિતૃકૃપા હોટલ નજીક કાર્યવાહી, કુલ રૂ. 64.62 લાખનો મુદ્દામાલ કબજે; એક આરોપી ઝડપાયો, ત્રણ વોન્ટેડ

રાજકોટ ગ્રામ્ય લોકલ ક્રાઇમ બ્રાન્ચ (LCB) દ્વારા શાપર-વેરાવળ પોલીસ સ્ટેશન વિસ્તારમાં રાજકોટ-ગોંડલ નેશનલ હાઇવે પર પિતૃકૃપા હોટલ નજીક મોટી કાર્યવાહી હાથ ધરી ટ્રકમાંથી રૂ. 34,05,190 કિંમતનો ભારતીય બનાવટનો વિદેશી દારૂ અને બિયરનો જથ્થો ઝડપી પાડવામાં આવ્યો છે. ટ્રક સહિત કુલ રૂ. 64,62,248નો મુદ્દામાલ કબજે કરવામાં આવ્યો છે.

નાયબ પોલીસ મહાનિરીક્ષક નિર્લિપ્ત રાય (IPS), રાજકોટ રેન્જ તથા રાજકોટ ગ્રામ્ય જિલ્લા પોલીસ અધિક્ષક **વિજયસિંહ ગુર્જર (IPS)**ના માર્ગદર્શન હેઠળ દારૂ-જુગાર જેવી ગેરકાયદેસર પ્રવૃત્તિઓ સામે ચાલી રહેલી ઝુંબેશ દરમિયાન એલ.સી.બી.ની ટીમ પેટ્રોલિંગમાં હતી. તે દરમિયાન ખાનગી બાતમી મળી હતી કે ટ્રક નં. GJ-25-U-9934માં ગેરકાયદેસર રીતે વિદેશી દારૂનો જથ્થો ભરીને પસાર થવાનો છે.

બાતમીના આધારે એલ.સી.બી.ની ટીમે રાજકોટથી ગોંડલ તરફ જતા નેશનલ હાઇવે પર વોચ ગોઠવી હતી. દરમિયાન શંકાસ્પદ ટ્રકને અટકાવી તપાસ કરતાં તેમાં અલગ-અલગ બ્રાન્ડની 6,491 વિદેશી દારૂની બોટલો અને 984 બિયર ટીન મળી કુલ 7,475 નશીલા પદાર્થો મળી આવ્યા હતા.

પોલીસે દારૂના જથ્થા ઉપરાંત દારૂના કવરિંગ માટે વપરાયેલા 259 ખાખી બોક્સ, ટ્રક, મોબાઇલ ફોન અને અન્ય સામગ્રી સહિત કુલ રૂ. 64,62,248નો મુદ્દામાલ કબજે કર્યો હતો.

પોલીસે ટ્રક ચાલક ભરત હમીરભાઈ મોરી (ઉ.વ. 22), રહે. વાંસજાળીયા ગામ, તા. જામજોધપુર, જી. જામનગરને ઝડપી પાડી તેની સામે શાપર-વેરાવળ પોલીસ સ્ટેશનમાં ગુનો નોંધાવી વધુ તપાસ હાથ ધરી છે.

વોન્ટેડ આરોપીઓ

પોલીસ તપાસમાં નીચેના આરોપીઓની સંડોવણી સામે આવતા તેમને વોન્ટેડ જાહેર કરવામાં આવ્યા છે:

• કરણ રબારી, રહે. ઉપલેટા (દારૂનો જથ્થો મંગાવનાર)
• અજાણ્યો ઇસમ (દારૂનો જથ્થો મોકલનાર)
• ટ્રક નં. GJ-25-U-9934નો માલિક

કબજે કરાયેલ મુદ્દામાલ

• વિદેશી દારૂની બોટલો અને બિયર ટીન – રૂ. 34,05,190
• દારૂના કવરિંગ માટે વપરાયેલા 259 બોક્સ – રૂ. 10,52,058
• મહિન્દ્રા બ્લેંજો ટ્રક નં. GJ-25-U-9934 – રૂ. 20,00,000
• મોબાઇલ ફોન – રૂ. 5,000
• અન્ય દસ્તાવેજો

કુલ મુદ્દામાલ: રૂ. 64,62,248

આ સમગ્ર કાર્યવાહી એલ.સી.બી. રાજકોટ ગ્રામ્યના પોલીસ ઇન્સ્પેક્ટર જે.પી. રાવના નેતૃત્વ હેઠળ પો.સબ.ઇન્સ. એચ.સી. ગોહિલ, કે.એમ. ચાવડા, આર.વી. ભીમાણી સહિતની ટીમે સફળતાપૂર્વક પાર પાડી હતી.