ગોંડલમાં ATM છેતરપીંડીનો ભંડાફોડ : મદદના બહાને કાર્ડ બદલી 40 હજાર ઉચાપત કરનાર શાતિર ઝડપાયો.

ગોંડલમાં ATMમાંથી રૂપિયા ઉપાડવામાં મદદ કરવાની આડમાં છેતરપીંડી કરનાર એક શાતિર આરોપીને ઝડપવામાં લોકલ ક્રાઇમ બ્રાન્ચ (LCB) રાજકોટ ગ્રામ્યને મોટી સફળતા મળી છે. આરોપી લોકોનો વિશ્વાસ જીતી ATM કાર્ડ બદલી રૂપિયા ઉપાડી લેતો હોવાનો ખુલાસો થયો છે.
નાયબ પોલીસ મહાનિરીક્ષક નિર્લિપ્ત રાય તથા રાજકોટ ગ્રામ્ય પોલીસ અધિક્ષક વિજયસિંહ ગુર્જરના માર્ગદર્શન હેઠળ મિલ્કત વિરુદ્ધના ગુનાઓ શોધવા માટે ખાસ ડ્રાઇવ ચાલી રહી છે, જેમાં આ મહત્વપૂર્ણ કેસ ડીટેક્ટ કરવામાં આવ્યો છે.
📌 ઘટનાની વિગત
ગોંડલ શહેરના મોહન પાર્ક વિસ્તારમાં રહેતી ફરીયાદી મહિલાને તા. 25 માર્ચ 2026ના રોજ એક અજાણ્યા ઇસમએ ATMમાંથી રૂપિયા ઉપાડવામાં મદદ કરવાની ઓફર કરી હતી. આરોપીએ ચતુરાઈથી તેમનું ATM કાર્ડ બદલી નાખી ખાતામાંથી રૂ. 40,000 ઉપાડી છેતરપીંડી આચરી હતી. આ અંગે ગોંડલ સીટી એ-ડિવિઝન પોલીસ સ્ટેશનમાં ગુનો નોંધાયો હતો.
📌 કેવી રીતે પકડાયો આરોપી?
એલસીબીની ટીમ પેટ્રોલિંગ દરમિયાન ગોંડલ સર્કિટ હાઉસ સામે આવેલા IDBI બેંકના ATM પાસે શંકાસ્પદ હાલતમાં એક ઇસમને ઝડપી લીધો હતો. તપાસ દરમ્યાન તેની પાસે અલગ-અલગ બેંકના 10 ATM કાર્ડ મળી આવ્યા હતા. યોગ્ય પુરાવા ન આપી શકતા કડક પુછપરછમાં આરોપીએ ગુનો કબૂલ કર્યો હતો.
📌 આરોપીની ઓળખ
ઝડપાયેલ આરોપીનું નામ દિપકસિંગ સંતોષસિંગ સેંગર (ઉ.વ. 38) હોવાનું સામે આવ્યું છે. તે મૂળ ઉત્તર પ્રદેશનો રહેવાસી છે અને હાલ રાજકોટમાં ભાડેથી રહેતો હતો.
📌 ગુનાહિત ઇતિહાસ
આ આરોપી સામે અગાઉથી રાજકોટ શહેર અને ગ્રામ્ય વિસ્તારમાં છેતરપીંડી અને ચોરીના અનેક ગુનાઓ નોંધાયેલા છે, જેના કારણે તે રિપીટ ઓફેન્ડર હોવાનું બહાર આવ્યું છે.
📌 કબજે કરેલ મુદ્દામાલ
અલગ-અલગ બેંકના ATM કાર્ડ – 10 નંગ
મોબાઇલ ફોન – 2 નંગ (કિ.રૂ. 5,500)
📌 આરોપીની મોડસ ઓપરંડી (M.O.)
આરોપી ATMની આસપાસ ચક્કર મારી ખાસ કરીને વૃદ્ધ, અભણ અથવા એકલા વ્યક્તિઓને નિશાન બનાવતો હતો. મદદના બહાને PIN નંબર જાણી લઈ ATM કાર્ડ બદલી દેતો અને પછી પૈસા ઉપાડી લેતો હતો.
📌 કામગીરી કરનાર ટીમ
આ કામગીરી LCB રાજકોટ ગ્રામ્યના PI વી.વી. ઓડેદરા, PSI કે.એમ. ચાવડા, PSI એચ.સી. ગોહીલ, PSI આર.વી. ભીમાણી, PSI પી.એન. ભરવાડ સહિતની ટીમે સફળતાપૂર્વક પાર પાડી હતી.
⚠️ જનતા માટે ચેતવણી
પોલીસ દ્વારા જનતાને અપીલ કરવામાં આવી છે કે ATMમાં અજાણ્યા વ્યક્તિની મદદ ન લેવાય અને પોતાનો PIN નંબર કોઈને ન જણાવવો.