વીર નર્મદ દક્ષિણ ગુજરાત યુનિવર્સિટી, સુરત સંલગ્ન અને ગાંધી વિદ્યાપીઠ, વેડછી સંચાલિત સ્નાતક અધ્યાપન મંદિર, બી.એડ્. કોલેજ, વેડછીમાં રક્ષાબંધન પર્વની અને વિશ્વ આદિવાસી દિવસની ઉજવણી કરવામાં આવી.

આ તકે રક્ષાબંધન પર્વ નિમિત્તે મુખ્ય વક્તા તરીકે દક્ષિણ ગુજરાતનાં જાણીતા કવયિત્રી અને લેખિકા તથા અધ્યાપક ડૉ. સંધ્યાબહેન ભટ્ટ ઉપસ્થિત રહ્યાં હતાં જ્યારે આદિવાસી દિવસ સંદર્ભે વ્યાખ્યાન આપવા આદીવાસી સમાજને પોતાની સંસ્કૃતિ માટે જાગૃત કરવા સતત મથતા વડિલશ્રી મનોજભાઈ ચૌધરી ઉપસ્થિત રહ્યાં હતાં.

બન્ને કાર્યક્રમ સંસ્થાનાં મંત્રીશ્રી, ડૉ. અંજનાબેન ચૌધરીનાં માર્ગદર્શન હેઠળ યોજાયા હતાં. આ તકે તાલીમાર્થીઓ તથા અધ્યાપકો સક્રિય રીતે જોડાયા હતાં.

સમગ્ર કાર્યક્રમ ૨ સત્રમાં યોજાયો હતો. પ્રથમ સત્રમાં રક્ષાબંધનનો કાર્યક્રમ અને દ્વિતીય સત્રમાં વિશ્વ આદિવાસી દિવસની ઉજવણી કરવામાં આવી હતી.પ્રથમ સત્રમાં સંસ્થાનાં મંત્રી ડૉ. અંજનાબેન ચૌધરીએ સૌને સત્કાર્યા હતાં અને પ્રસ્તાવિક વક્તવ્ય આપ્યું હતું. એક ભાઈને બહેન દ્વારા પ્રતીક રાખડી બાંધી રક્ષાબંધન પર્વનો પ્રારંભ કર્યો હતો. સાથે જ તાલીમાર્થીઓએ અગાઉથી જ બનાવેલી સુતરના તાતણાની જાતે બનાવેલી રાખડીઓ બાંધીને તમામે એકબીજાને રક્ષાબંધનની શુભકામનાઓ પાઠવી હતી.

અને સંસ્થા દ્વારા સૌનું પેંડાથી મીઠું મોઢું કરવામાં આવ્યું હતું. વળી અધ્યાપક ડૉ. ભાવના મહેતા તથા પ્રો. અવની જોશી એ આ પર્વ નિમિત્તે વક્તવ્ય આપ્યું હતું. બે પ્રશિક્ષણાર્થીઓએ પણ વક્તવ્ય આપ્યું હતું સાથે જ મુખ્ય વક્તા ડૉ. સંધ્યાબેન ભટ્ટે કવિ અવિનાશ વ્યાસ, બળવંત ઠાકોર, વિષ્ણુ ભાલીયા, ચંદ્રકાંત ટોપીવાલા વગેરે સાહિત્યકારોની ભાઈ – બહેન વિશેની કવિતાઓને યાદ કરી રક્ષાબંધન નિમિત્તે ખુબ જ રસાયણ શૈલીમાં પોતાનું વ્યાખ્યાન પ્રસ્તુત કર્યું હતું.

તેઓએ જણાવ્યું હતું કે, પારિવારિક ભાવનાને જીવનમાં અદકેરુ સ્થાન છે. વધુમાં રક્ષાસુત્ર એટલે સંકલ્પ સૂત્ર એવું જણાવ્યું હતું. સાથે જણાવ્યું હતું કે ભાઈ-ભહેનનાં અદ્રશ્ય વચનનું આમ જોઈએ તો કંઈ જ મૂલ્ય નથી પરંતુ, આમ જોઈએ તો તે અમૂલ્ય છે. સાહિત્યની સાથે તેમણે રાષ્ટ્રભક્તિને પણ આપણા હૃદયમાં અલગ સ્થાન હોવાની વાત કરી હતી. આપણા પ્રતિજ્ઞા પત્રને યાદ કરીને ભારત મારો દેશ છે અને બધા ભારતીયો મારા ભાઈ બહેન છે. એ વાત સાથે તેમણે માતૃભાવ અને ભગીનીભાવ આપણા સૌના હૃદયમાં વિકસિત થાઓ એવી કામના કરી હતી. અંતે તેમણે જણાવ્યું હતું કે, આપણે કંઈ પણ કરીએ ત્યારે જો નિષ્કામ કર્મ કરીએ તો તે સફળ થાય જ છે. ભાઈ બહેનનો પ્રેમ પણ આવો જ નિષ્કામ, નિ:સ્વાર્થ હોવો જોઈએ. એટલા માટે જ ભાઈએ અને બહેને એક બીજાને માફ કરવું, પરસ્પર ઘસાવવું, પરસ્પર સ્નેહ રાખવો અને એકબીજાને હંમેશા સાથ આપવો જોઈએ.

દ્વિતીય સત્રમાં વિશ્વ આદિવાસી દિવસની ઉજવણી કરવામાં આવી. કોલેજનાં પ્રશિક્ષણાર્થીઓએ ચૌધરીજોડુ , ગામીતજોડુ, કોંકણી જોડું, ઢોડિયા પટેલ, ડાંગી, મરાઠી, વસાવા વગેરે જોડા બનીને આદિવાસી સમાજનાં રીત-રીવાજોની પોતાની પ્રાદેશિક બોલીમાં રજુઆત કરી. આ તકે શ્રી મનોજભાઈ ચૌધરીએ આદિવાસી સમાજનાં રીત-રીવાજોની પોતાની પ્રાદેશિક બોલીમાં આગવી છટાથી રજુઆત કરી. તેમણે પર્યાવરણ જતન, સંસ્કૃતિ સંરક્ષણ અને આદિવાસીઓનાં અધિકારો પ્રત્યે જાગૃત થવા નવી પેઢીને આહવાન કર્યું હતું. કાર્યક્રમનાં અંતે એફ. વાય. બી. એડ્. ની તાલીમાર્થીનીઓએ આદિવાસી નૃત્ય પ્રસ્તુત કરી, જય જોહર જય આદિવાસીનાં નાદ સાથે કાર્યક્રમ પૂર્ણ કર્યો હતો.