વીર નર્મદ દક્ષિણ ગુજરાત યુનિવર્સિટી સંલગ્ન અને ગાંધી વિદ્યાપીઠ સંચાલિત સ્નાતક અધ્યાપન મંદિર બી.એડ્. કોલેજ, વેડછીમાં ગુરૂપૂર્ણિમાનો ગરિમાપૂર્ણ કાર્યક્રમ યોજાયો.

સમગ્ર કાર્યક્રમનું વ્યવસ્થાપન પ્રાધ્યાપક ડૉ. ભાવનાબેન મહેતાએ કર્યું હતું. દીપ પ્રાગટ્ય દ્વારા કાર્યક્રમને ખુલ્લો મુક્યો ત્યારબાદ પ્રશિક્ષણાર્થીઓએ ગુરુ પ્રત્યેનો પોતાનો અહોભાવ પ્રગટ કરતું વક્તવ્ય આપ્યું અને તમામ ગુરુઓનું ગુરુપૂજન કર્યું તથા પુષ્પગુચ્છથી સત્કાર્યા.

આ તકે પ્રાધ્યાપકોએ પ્રશિક્ષણાર્થીઓને ખૂબ સુંદર સંદેશ અને શુભેચ્છા પાઠવ્યા. પ્રાધ્યાપક શ્વેતાબેન ચૌધરીએ ગુરુનું જીવનમાં મહત્ત્વ સમજાવ્યું. પ્રાધ્યાપક ડૉ. ક્રિષ્ના કટારાએ જણાવ્યું કે જીવનમાં પ્રાપ્ત કરેલા જ્ઞાનને વ્યવહારમાં મૂકવું આવશ્યક છે.

માત્ર જ્ઞાન મેળવવાથી જ્ઞાની નથી બની શકાતું જ્યારે ડૉ. ભાવનાબેન મહેતાએ ગુરુ અને શિષ્યના સંબંધ પરસ્પર પૂરક છે. ગુરુ વગર શિષ્ય અને શિષ્ય વગર ગુરુ અધૂરાં છે. જગત્તગુરુ શ્રીકૃષ્ણ અને તેનાં ગુરુ સાંદિપનીનું સ્મરણ કરી, જૂની અને જાણીતી કહેવત “ગુરુ કરતાં શિષ્ય ચઢ્યા” નો ઉલ્લેખ કર્યો.

તેઓએ વિવિધ ઉદાહરણો દ્વારા પ્રાસંગિક ઉદ્બોધન કર્યું અને ઉપસ્થિત તમામ પ્રશિક્ષણાર્થીઓનાં ઉજ્વળ ભવિષ્યની કામના સાથે પોતાનું વક્તવ્ય પૂર્ણ કર્યું. આમ, અધ્યાપકોએ છાત્રોને શુભેચ્છા પાઠવી. અંતે છાત્રોએ જાતે બનાવેલા કાર્ડથી અધ્યાપકોને સન્માનિત કર્યા. સમગ્ર કાર્યક્રમ ખૂબ જ ગરિમાપૂર્ણ રહ્યો.