ગોંડલમાં ચાઈનીઝ દોરીની 96 ફીરકી સાથે દિપ, રાજુ અને વિજય પકડાયા.

ગોંડલમાં ચાઈનીઝ દોરીની 96 ફીરકી સાથે ત્રણ શખ્સ પકડાયા હતા. ત્રણેય સામે ગુનો દાખલ કરવામાં આવ્યો છે. રાજકોટ રૂરલ એલસીબી પીઆઈ વી.વી. ઓડેદરાના માર્ગદર્શન હેઠળ પીએસઆઈ એચ.સી. ગોહિલ પોતાની ટીમ સાથે ગોંડલ શહેર વિસ્તારમાં પેટ્રોલીંગમાં હતા ત્યારે બાતમી મળી હતી કે ભોજરાજ પરા શેરી નં.24/13 ખાતે આવેલી ગેલ કૃપા પ્રોવિઝન સ્ટોર નામની દુકાનમાં ચાઈનીઝ દોરીની પ્રતિબંધિત ફીરકીનું વેચાણ થઈ રહ્યું છે.

સ્થળ પર દરોડો પાડતા દુકાનમાંથી રૂા.10,650ની કિંમતની 71 ફીરકી મળી આવી હતી. જે જપ્ત કરી વેપારી દિપ વિમલભાઈ કોટડીયા (ઉ.21, રહે.ગોંડલ, ભોજરાજ પરા)ની અટકાયત કરી ગોંડલ બી. ડીવીઝન પોલીસ મથકે ગુનો દાકલ કરાયો હતો.

આ તરફ ગોંડલ સીટી પોલીસની ટીમ પેટ્રોલીંગમાં હતી. ત્યારે માહિતી મળતા ગોંડલ જે.કે. ચોકમાં કેબીન રાખી ચાઈનીઝ દોરી વેચતા રાજુ બચુભાઈ પરમાર (ઉ.46, રહે.ગોંડલ, ભગવતપરા) અને વિજય મનસુખભાઈ ડાભી (ઉ.23, રહે. ગોંડલ આશાપુરા સોસાયટી, હનુમાનજી વાળી શેરી)ને ઝડપી લીધા હતા. આ બંને પાસેથી રૂા.3750ની કિંમતની 25 ફીરકી કબ્જે કરી ગોંડલ સીટી પોલીસ મથકે જાહેરનામા ભંગનો ગુનો નોંધવામાં આવ્યો હતો.